Singvogel

Mir het der Doggder gsäit,wenn ych das rächt verstand:

S Mandleschnyyde mache mir jetz ambulant.

Do han y gsäit: Ou näi, y mag das nit verlyyde,

wenn denn s Parkiere düürer kunnt

als s Mandleschnyyde.

Yych find, dass sich d Frau Martullo guet verkauft:

Sii het e Muul, wo lauft und lauft und lauft und lauft.

Wobyy jo der Verglyych mit VW gar nit hinkt.

Denn das, was uusekunnt, das stinkt und stinkt und stinkt.

Wo zwüsche Stewi, Kugelgrill und Gaartetisch

zem dritte Moll e gääli Drohne glandet isch,

do säit der Räägewurm ze sym Kolleeg, em Schnäggli:

Jetz griegt d Frau Frey scho wider e Zalando-Päggli.

D Frau Köchli lauft der Heubärg ab mit ihrem Bello.

Em Hund däm stinkts e bitz. Er schnupperet amme Vello.

Denn findet är e Pfoschte, g’äignet für sy Zwägg.

Doch won er s Bäi denn lüpft, do isch der Pfoschte wägg.

Und während er als no stoht und stuunt ab däm Gebaare,

wird er vommene Liiferwaagen überfahre.

Wenn d Frau Martullo schwätzt, denn döönt das rächt kommuun.

Me frogt sich scho: Isch das jetz das Rumantsch Grischun?

Also yych verstand käi Woort. – Do wyyst mi äin druff hii:

Das won ych ghöört häig, syg vermuetlig Änglisch gsii.

Mir wo in Basel wohne, mir verstöhn das Gschyss nit,

wenns am Tattoo bitz Lärme vo der Patrouille Suisse git.

Mir finden überhaupt nit, dass die Fluugi stööre.

Mir mien denn fümf Minute d Duudelsegg nit hööre.

Y haan e Bünder gfrogt: Jä hänn dir denn e Knall?

Isch das jetz wirgglig eures beschte Ross im Stall?

Do säit dä: Näi, es isch meh praktischer Natuur.

Wenn sy in Bärn isch, isch sy wyt ewägg vo Chur.

Y bi ammene Oobe döört am Rhyybord gstande

und ha zwüsche Hochdütsch, Änglisch, Hochdütsch, Amerikanisch, Änglisch

plötzlig e baar Fätze Baseldütsch verstande.

Y ha dä gfrogt: Kunnsch au us Basel? Häi-äi-äi!

Do säit dä: Jee, dä Zuefall! Wie isch d Wält doch gläi.

Jetz will d Regierig z Lieschtel spaare, wo s nur goht.

Zem Byspiil s Loogo wird jetz faarbloos anstatt root.

Und oobedrüüber glääbe – s isch nümm z underbiete –

statt de siibe Düpf symboolisch no fümf Niete.

Hänn Siin en au scho gseh? Der Heidi-Film isch doo!

Das nätte Mäitli, härzerwermend früsch und froh.

Das macht die gueti Bündner Luft! – Und scho sehschs yy:

D Frau Martullo kaa nit us Graubünde syy.

Will d Menschen immer elter wärde, s isch esoo,

wird s Räntenalter bald uf achzig uffedoo.

In Ränte erscht mit achzig, näi, das wär denn schyssig!

S Tamara Wernli wird dä Herbscht erscht achtedryssig.

Uf der Autobahn vor Bärn kunnt d Frau Martullo

wäge Raase in e Bolizei-Kontrullo.

S miech äifach Spass, säit sii däm Schugger unverhohle,

wenn sii der äige Vater rächts könn überhoole.

In zwanzig Johr stöhn uf em Määrtblatz nach de Viere

zwäi Millioone Lüt, wo Faasnacht konsumiere.

Und zmittsdrinn pfyfft der letschti Ueli ehrevoll

für sich eläi die dritti Stimm vom Rossignol.

Schweizer Politik

Brunzguttere

D Martullo-Blocher, wo dr Christoph uns zur Rettig schiggt

isch us em glyyche Holz wie äär, das hän miir schnäll erliggt.

Nuur wenn de gnauer aaneluegsch, so froggsch unwiderrueflig:

Was isch das für e Schryyner gsi, und waas macht dää ächt brueflig?

Doggter FMH

Si s git e kai Aerztestop mee wäge dääne SVP Affe

S dörfen alli – au us Dütschland – wiider do ko schaffe

Und dorum bringt s näggscht Joor, das macht mi grangg

Sicher e Schwoobenarzt my Schnitzelbangg!

Die Gsalzene

Dr Gepetto seit: «Pinocchio mir mien dini Naase teschte.

Wie erraiche mir die maximali Lengi ächt am beschte?

Kum neecher, glaine Holzkopf, und denn flischtrisch in my Oor:

‹D’Krankekasseprämie styyge nit im näggschte Joor!›»

D Rätschbääse

D Finanzwält lauft hitt digitaal, dien alli Meedie brichte

Me will sogaar in näggschter Zyt uff s Baargäld ganz verzichte

Uus unsrer Sicht sinn d Folge vo däm Trend sensazionell

Dr Finanzchef Ueli Maurer git s denn numme no virtuell

PereFiss

Marignano isch e Kampfplatz gsi, fir uns Eidgenosse,

Deert hämmer briiglet, gstoche, gmetzlet, mit der Armbruscht gschosse,

Mir schleen uff alles Fremde-n-yy, doch was uusekunnt isch schytter,

D Politik vo der SVP isch hitte nooni wyter

Die Unerheerte

Die zwaiti Gotthardreere muess me zwingend baue

Damit sich d Schwoobe voor em Dunnel nimm dien staue

Und wenn sii dinn sin diemer voorne, hinde schliesse

Denn kaa me d Ooschtre im Tessiin mool wiider gniesse

Basler Politik

Anggewegglimaitli

Die Angela, die traut sich ‘was,

Sagt einfach nur: «Wir schaffen das!»

In Basel sagt man solches nicht,

In Basel heisst’s: «Mir mache dicht!»

Dräggspatze

S fielt sich mängen in Basel nümm wool

findsch es uusgstorbe, langwyylig, hool?

Die autofrei Stadt macht di krank

es fäält hald aifach – dr Lärm und dr Gstangg

Die Blauäugige

Waffe, Pizza, Körperteil – hüt druggt me s in drei D

scho jetz kasch so Roböterli wie Mensche laufe gsee

Mir hän us Jux dr Morin druggt – riskiere Kopf und Kraage

doch dä Kaib beweggt sich nit und ka nur «Griezi» saage.

Dreydaagsfliege

Är stoot nur sich und uns im Wääg,dä Baschi, dasch verruggt

wenn s en bruuchti isch es so als haig en d Äärde gschluggt

s Profil isch dürr, me waiss nid rächt: was will er und was soll er?

Im näggschde Lääbe stoot dä glaub am Spaalebärg als Poller

Schunggebegräbnis

Jetz goht der Guy gly, das seit är usdrügglig,

mir schiggen is dry und sinn alli glügglig.

Nur dr Kessler isch druurig,

däm stinggt s sogar schuurig,

denn jetz fählt em über Nacht

ein, wo ihm dr Kaffi macht.

Schweizer Fernsehen

Brunzguttere

E fiechte Furz statt Kassesturz, käi Glooria und käi Glanz...

Us ‹Sport aktuell› wird ‹Sport vo gescht› – d Arena stryycht me ganz.

Statt ‹Äine geege Hundert› spiilt me ‹Käine geege mi›,

und was diir do grad gsee händ isch dr Faasnachtsgweerschnitt gsi!

Käller-Assle

Was mache au die Fraue doo,

wo bim Bachelor mien haime goo?

S glyych wie vorhär, ganz ooni Gspass,

die schteen wiider in dr Wäbergass.

Baselbiet

Heiri

Mir bruuche nid nur käi so Uni, s glyych gilt au für d Kultuur.

Bi dr Kultuur, do sy mir Buure generell sehr stuur.

Mir liebe nur d Literatuur, die choschtet käi Föiflyyber.

Mir lääse tääglig in dr Zytig d Inserat vom Hieber.

Peperoni

S Theater wott, han y vernoo,

d Landschäftler soo nimm yyne loo.

Die sette me draa zaale, doch dängget draa bim zwänge:

Ooni d Basler uss em Baselbiet, wurd’s Tabourettli länge.

Schunggebegräbnis

Es seit dr alt Leu zue sym Sohn: «Lueg dört ääne

darfsch gar nie go spiile, dört wohne d Hyäne,

fallsch dääne in d Klaue,

kasch lang go miaue,

s sinn Schmarotzer, s isch e Schand …»

«Papi, isch dört Baselland?»

(Hesch s as Hyäne nit so schwär:

Bisch 80-fache Millionär!)

Spitzbueb

E Baselbieter sait z Athen:

«Ych bin us Lieschtel - Du verstehn?»

«Jä ych verstand», sait druff der Griech,

«do hesch Gäld, Du arme Siech!»

PereFiss

Mir Basler nämme d Baselbieter finanziell zer Bruscht,

Die suuge, suuge, suuge, suuge, suuge – s isch e Luscht.

Und wenn si denn gnueg gsooge hänn, no setze si e Zaiche,

Und dien is partnerschaftlig aimool mee an Schaiche saiche.

Heiri

Me will d Spitääler zämmelegge, Sii, dasch käi Furzidee.

Nur gmäinsaam chönne mr spaare, s Bruederholz bruucht niemer mee.

Öb Basel oder Lieschtel isch mir doch glyych, Gottloob.

Dä Dokter, wo mr hindenyyneluegt, isch äinewääg e Schwoob.

Peperoni

«Die achzig Chischte wei mer nit!

Do macht denn d SVP nit mit!

Nur wääge däre Uni do, wärdet zerscht konkreet.

Und überhaupt, was isch das gnau, en Uniwersideet?»

Elektronik

Die Blauäugige

I muess nur ei Zucchini ha – drugg us Versee Banaane

und wo-n-y d Waar due scanne, mäldet sich doch nundefaane

my Smartphone mit me Bild dervo und e Stimm macht Drugg:

Sy isch nit ryff, sy isch no grien – leg sy wider zrugg!

Schlyffstai

Bim surfe uff em Netz han-i us Gwunder und zvyyl Zyt

Mol gluegt, was es uff Ricardo so alls z'erstaigere gitt.

Doch kauft han-i denn nyt – ych ha dr Sinn dervoo nit gsee.

Im Grund gnoo kenntsch fir das diräggt e Bebbisagg z'Hilf nee.

Uff Youtube bini denn e bitz go Schnitzelbängg go loose.

Doch rächts am Bildschirmrand erschyynt grad Wäärbig fir die Hoose,

Won-i vor finf Minute aagluegt ha, s'gääb zwai fir drei.

Ich ha bitz dr Verdaacht, mi PC schafft fir d'NSA.

Das heert nimm uff! Die Hoose isch jetz immer mit derbyy:

Bim Ferie Bueche, Faarblaandrugg, surf ych nimm ooni si.

s'E-Banking wett si kaufe, will si sig so scheen und schlicht!

Und mittlerwyyle zaigt mir Facebook nei die Hoose statt mi Gsicht.

Vor lutter Hoose han-i bald my Bildschiirm nimme gsee:

Mit Pop-ups, Banner, Google-Mobbing, Clickbait und no mee.

Z'letscht han-i mir mit Mastercard die Hoose sälber gschänggt,

Und ha si denn dehaime in däm Bebbisagg versänggt.

BVB

Heiri

Die mittleri Brugg isch z niider. D Schiff miesse sich duurezwänge.

Y weiss nid, wo s Problem lyt. Die Brugg muess me nid spränge.

Me chaa in Weil e Haafe boue für d Tanker und für d Frachter.

Für die letschte Meter bis in d Schwyz näme d Waare denn dr Achter.

Luuszäpfe

Z Basel heersch bald nur no ‹Hochdeutsch›, das isch gar nit scheen.

Zum Gligg hänn mir jetzt uusegfunde, wie mir das umgeen:

jede Samschtig faare mir uff Lörrach, kaufe‘n yy

und kenne deerte – waisch wie glatt – ganz unter Bebbi syy.

Verschiedene Themen

Dootebainli

Wottsch näbe Sharm El Sheik Paris und Stambul bsueche,

hesch vor de Feerie Schiss, de wuurdsch die letscht Rais bueche.

Es isch nit guet fir s Gschäft, wenn s jeede so verstoot,

As bi ‹Last Minute› aim denn s letschte Stindli schloot.

Schwoobekäfer

Dr Crédit Suisse vo Ziri het e neje Chef biko

Dä basst in s gwohnti Bild vom Schwyzer Bängger nit eso.

Doch grad fir uns in Basel isch dä neji Ma e Hit:

Me gseht bim erschte Augeschyn: E Zircher isch das nit!

Die Gsalzene

E Nasa-Mediekonferänz het kiirzlig d’Wält beweggt

Uff em Mars haig me e primitivi Lääbensform entdeggt

Die ainzig Froog sig no: Wie kennt me die Amöbe kondaggtiere?

Unsre Vorschlaag: Dient‘s uff jede Fall mit Ziiridytsch broobiere

Hansli Bargäld

Kinder griege schuelfrei, und d‘Stroosse wärde gschmüggt.

Die Junge, die dien juble, die Alte sin entzüggt.

S‘isch nid dr Morin-Abgang, wo me do zelebriert.

Fyrs Drummeli vo nägscht Joor haig ain zwai Billje reserviert.

Laggaffe

Es isch e Spiil vo Liecht und Schatte,

Vo dr Solitude bis zur Landhof Matte,

Basel verdanggt dr Roche so allerhand,

jetzt au die gröschti Sunnenuhr vom Land

PereFiss

S gitt neii Smartphones und Tablets fir d Basler Schuggerei,

Drum muess e jeede d Schuelbangg drugge, kaine griegt doo frei.

Am Änd vom Grundkurs mäldet sich spontan der Gfreiti Riffel:

«Bi myner neie Daafele fäält s Schwimmli und der Griffel!»

Die Gsalzene

D’Schwyzer – brav und gwissehaft

Hätte sich gärn e WM bschafft

Mit Schmiirgäld miechte si gärn Drugg

Doch d’Meerwärtstyyr, die wänn si zrugg!

Nachtschwärmer

E Couvert mit paar Millione Franggge

Git ain em andere, und dä sait dangge

Das Couvert het zwar niemer gää,

und s’hets au kaine griegt

Und drotzdäm isch das Couvert schuld,

dass dr Blatter fliegt.

Giftnuudle

Unsery Wält isch grangg, soo gitts emol e Gnall

Flichtlingseländ und Terror iiberall

ai Liechtbligg gitts won ys Gliggseelyghait duet bringe

dr Bo Katzmann heert jetz ändlig uff mit singe

Käller-Assle

Dr Pabscht Franziskus maint zu Gott,

das är sy Schtell im Himmel wott.

Do maint dä, dass das so nit lauft.

Dä Blatz het scho dr Blatter kauft